Am Märtesfeuje
von Brunhild Dörr

Ech maat mech ob de Wääch öm bei de Vürbereidonge für dat Märtesfeuje zozekicke. Von weidem soch ech at de 4 huhe Stämm, die en de Boddem jerammp woren. Se belden de Grondlaach für de Schanzepyramid. En Berch von Schanze looch ob de Erd, jrad rechtech für e jot Feuje. De Pänz on de Jongjeselle woren met Eiffe bei de Saach. Se woßten jenau, wie dat Fondament für de Zündladung aanjelaach wäre mot. Reih ob Reih wuren de Schanze jestapelt. Emme hühe eropjeschmesse. Et leef wie jeschmiert. Et wurd schwadroniert on lammentiert: „Hoffenlich hamme jenoch Wend? – Avwaade“ ! Jenößlech dronken de Jongjeselle e Dröppche, on de Pänz vekimmelten ihr Botteramme. De janz Bagasch wor en Schwulität. Et wor wie bei enne Zeremonie. Emme hühe wuren de Schanze bugsiert. Alles mot jot stabilisiert wäre. De Schanze sech schräch en de Mette neije, domit en Kaminwirkung endsteit. Bei jodem Wend wirk dann de Stärk von dä Luffströmung wie e Sandgeblöös on de Flamme wären huhgebloose. De Silhouette dä huh objestappelt Schanze, de kaahl Ovendluff, die einem Träne en de Aure dreiwe lees, vestärkten en mir dat Jeföhl en enem Zauberland ze senn. Eine dä Jonge song aale Märtes lede, die mir at als Kende jesonge hann: „Jett oos jett für et Mätesfeuje, en Böu Strüh, en Sack voll Flüh“ on dat Leedche: „Sank Märtes, Sank Märtes, dat wor ene joode Mann. Er joof dä Kende Kärze on stoch se selver aan.“ De Kende, die eröm rannten, sochen ous wie kleine Gnome. Endlech wor et dann su weit. De Glocke von Sank Laurenzius woren am lögge, dat Zeichen, dat et Feuje aangezönd wäre konnt. Em nu wor dä Ovendhimmel erlüch. Dat lodernde Feuje dät de Schatte von dä Jestalte, die öm dat Feuje stonden, en et jijantische vezerre. Die Affstufunge dä Farve vom fass schwatze Himmel, wie e jemold Bild. Dä Bleeck ob oos Städtsche von eijenartije Schönheit. Et wor e Jeföhl von Vebondenheit, von Freud. Plötzlech wor ech vesonke en meng eijen Jedankewelt on daach: „ Irjend eine hät doch für oos für velle Johre domet anjefange on hoffentlich levv die Traditiun noch lang weide, für die, die noh oos kunn.

Wie joot, dat et Vereine jitt!
von Ulla Kehr

Jöv et kein Vereine en oserem Städtsche,
Jöv et seche vill mie zefriddene Fraue un Mädsche,
Doch hät me so ene Vereinsmeier daheim,
Hutsch me jede Ovend am Fernsehn – allein.

Em Heimatverein, do esse Kassierer,
Bei de Pfadfinder de Fähnleinfürer,
Schiedsrichter isse beim Foßballklub,
Für de Sportverein koche de Eazezuup.

Als Kolpingbrode braute Jlühwing em Advent,
Der jeht och fott, weil jeder ihn kennt,
Sing Frau moß Waffele backe, wenn et ihr och nit schmeck,
Denn et wör, wie er sät, für en Jode Zweck.

Er schwimmp un tauch em Schwimmverein,
Im Jesangverein schmetterte “Hänsjen Klein”.
Och em Eifelverein mit Rucksack un Jesang,
Spillte de “Fröhliche Wandersmann”.

Ob et rännt oder hagelt, ob et stürmp oder friert,
ob et blitz oder donnert, egal wat passiert,
un wenne bes an de Knie em Matsch versäuf,
der läuft, un läuft, un läuf ....!

Sujar bei de Feuerwehr führte Regie,
Als Kööksjeszupp–Koch esse direkt e Schenie!
On zwischendurch hätte och immer noch jet:
Ob einer Jeburzdach oder Jubiläum hät.

Als Mitjlied vom Elferoth moße Üwwerall jlänze,
Do froch ech mich doch: wo sin do de Jrenze.
Denn och bei de Schötze do esse dabei
Un marschiert Fronleichnam stiefstolz en de Reih.

Kütte dann heim isse meistens blau.
Do moß me doch froge: Für wat brouch der en Frau?
Bei jeder Versammlung do esse dabei,
Nur Mittwochs, do hätte noch frei.

Dann läuft de Sportschau em Fersehprojramm,
Dat es nur für ihn, dabei stürt nur de Mamm,
Doch die säät sech; “Jetz sinn ich et satt,
Nur immer nur stricke un wade daheim,
Ich john jetzt och in ene Verein! “

Mittwochs jeht se jetzt enene Käjelklub.
Dat hät at ens janz jot jeflupp.
Für die üwwerije Owende moß se noch jet finne,
Drum trof se sech met e paar Nohperinne.

Bei enem Tässje Kaffe han se sech vürjenonn,
Dat se einmal de Woch zesamme kunn.
Dat hät och bes jetzt janz jot jeklapp:
Se spille jetzt Moondachs Rummikab.

Se spille öm Jeld, ewwer nit so verbesse,
Es dann de Kass voll, dann john se fein esse.

Daheim litt dann en Zeddel ob´m Köschedesch:
“Jooden Appetit un e Bützje für Desch,
Et es noch Eazezupp em Pott,
Maach dir die warm, de Mamm es hück fott!“.

Wie se de restliche Owende verstiwwelt, dat moß mer ens sehn,
Mit jet Spaß an de Freud es et Lewwe immer noch schön!
De Mamm setz jetzt nimmie allein vür der Glotze,
Se deit nimie wade un och nimmie motze.

Jestere moot se sech ewwer in´nt Fäußje laache,
Do meinte -em Eans- me könnten doch ens jet zesamme maache!

Hätte sech also doch noch ob sing Frau besonne ?
On hät noch eine freie Owend für se jefonne:
Er schlooch ihr vür: -un dat es echt wohr,
“Mir john jetz jede Woch zesamme – en de Kirchechor!